हेटौंडा टुडे
हेटौंडा। हेटौंडामा बागमती प्रदेशस्तरीय कृषि प्रदर्शनी मेला २०८२ आयोजना हुने भएको छ। हेटौंडा–२ स्थित पल्पसा सभाहलमा चैत १३ गतेदेखि १६ गतेसम्म मेला सञ्चालन गरिने भएको हो । मकवानपुर उद्योग बाणिज्य संघको आयोजना, बागमती प्रदेश सरकारको सहयोग र हेटौंडा उपमहानगरपालिकाको सहकार्यमा मेला आयोजना गर्न लागिएको हो ।
आयोजक संघ अध्यक्ष प्रमोदसिंह रानाभाटले मंगलबार हेटौंडामा पत्रकार सम्मेलन आयोजना गर्दै मेलाको तयारी सुरु भइसकेको जानकारी दिए । उनका अनुसार मेलाको उद्घाटन बागमती प्रदेशका कृषि तथा पशुपंक्षी विकास मन्त्री मधुसूदन पौडेलले गर्नेछन् ।
संघका अध्यक्ष प्रमोद सिंह रानाभाट ले मेलाले कृषि क्षेत्रमा युवाको आकर्षण बढाउने र किसानको आत्मविश्वास अभिवृद्धि गर्ने विश्वास व्यक्त गरे। उनका अनुसार, स्थानीय उत्पादनको बजारीकरण र कृषिमा नवीन अभ्यासको विस्तारका लागि मेला उपयोगी प्लेटफर्म बन्नेछ।
मेलामा ४० वटा स्टल रहनेछन् । कोदो, जुनेलो, फापर, अचार, बाटेको धुप, केराको कप, म्याट, मस्यौरा, जुनारको जुस, अल्लोको समान, च्याउ, माछा, डेरी प्रोडक्टलगायत बस्तुको प्रदर्शनी हुनेछ । मेलामा करिब ५ लाख ७५ हजार १७८ रुपैयाँ खर्च अनुमान आयोजकले गरेको छ ।
