टुडे संवादाता 
असार ९,हेटौंडा /स्वास्थ्य तथा जनसंख्या मन्त्रालयले नेपालमा पछिल्लो २४ घण्टामा ५ सय ३८ जनामा कोरोना संक्रमण पुष्टि भएको जनाएको छ ।मंगलबार मन्त्रालयका प्रवक्ता डा. जागेश्वर गौतमले नियमित पत्रकार सम्मेलनमा ९० जना महिला र ४ सय ४८ जना पुरुषमा कोरोना पुष्टि भएको जानकारी दिए ।
योसँगै नेपालमा कोरोना संक्रमितको संख्या १० हजार नाघेको छ । नेपालमा हालसम्म १० हजार ९९ जना संक्रमित फेला परेको प्रवक्ता गौतमले बताए । तीमध्ये २४ जनाको दुखद् मृत्यु भएको छ । पछिल्लो २४ घण्टामा थप ४५ वर्षीय एक पुरुषको मृत्यु भएसँगै संक्रमणबाट मृत्यु हुनेको संख्या २४ पुगेको हो ।
प्रदेश अस्पताल सुर्खेतमा उपचाररत उनको सामेबार राति मृत्यु भएको हो । मृतक पुरुषमा यही असार ४ गते कोरोना भाइरस संक्रमण देखिएको थियो । त्यस्तै पछिल्लो २४ घण्टामा ८ महिला र ६८ जना पुरुष गरी ७६ जना संक्रमितको डिस्चार्ज भएका छन् । योसँगै संक्रमण निको हुनेको संख्या २ हजार २ सय २४ पुगेको छ ।
स्वास्थ्य मन्त्रालयका अनुसार, देशभरका ७७ जिल्लामध्ये ७६ वटा जिल्लामा संक्रमण देखिएको छ । बागमती प्रदेशको रसुवा जिल्लामा भने हालसम्म कोरोना संक्रमित व्यक्ति फेला परेका छैन ।
