हेटौंडा टुडे
९ असार, कतार
कतारबाट स्वदेश फर्केपछि बस्ने क्वारेन्टाइनबारे स्पष्ट खुलाउनुपर्ने भएको छ । स्वदेश फर्केपछि होटल क्वारेन्टाइन वा स्थानीय तहको क्वारेन्टाइनमा बस्ने भन्ने बारे फारम भर्दा स्पष्ट खुलाउनुपर्ने भएको हो । होटल क्वारेन्टाइनमा बस्नेले होटलको विवरण दिनुपर्ने भएको छ ।कतारबाट हेटौंडा फर्कर्ने तयारीमा रहेका ३५ बर्षीय युवालाई नेपाली राजदूतावास दोहा कतारले होटल क्वारेन्टाइनमा बस्ने भए होटलको नाम, ठेगाना सहितको सम्पूर्ण विवरण उपलब्ध गराउन भनेको छ ।
यसअघि हेटौंडा उपमहानगरपालिकाले विदेशबाट फर्केर स्थानीय तहको क्वारेन्टाइनमा बस्नेलाई क्वारेन्टाइनको व्यवस्था गर्ने जनाएको थियो । प्राप्त जानकारी अनुसार स्थानीय निकायको क्वारेन्टाइनमा बस्नेलाई प्रतिदिन सरकारको तर्फबाट १ सय ७५ रुपियाँ बराबरको खानाको व्यवस्था गरिएको छ । त्यस्तै हेटौंडाका विभिन्न स्तरका १० वटा होटललाई क्वारेन्टाइनमा प्रयोगमा ल्याइने भएको छ । विदेशबाट फर्किएकाहरूले प्रयोग गर्ने गरी शुल्क तिरेर बस्नका लागि मकवानपुर होटल एशोसियसनले कोभिड–१९ को रोकथाम, नियन्त्रण तथा व्यवस्थापन गर्ने टिमलाई क्वारेन्टाइनमा प्रयोग गरिने १० वटा होटलहरूको सूची दिएको हो । बिहान–बेलुकाको खाना, बिहानको नास्ता र दिउँसोको खाजा र सुत्ने व्यवस्था सहित सेवाग्राहीलाई प्याकेज सेवा दिने गरी हेटौँडाका १० होटलका २०५ वटा कोठा क्वारेन्टाइनमा प्रयोगमा ल्याइने भएको छ । एट्याच्ड बाथरुम सहितको प्रथम श्रोणीका ५८ वटा, द्वितीय श्रेणीका १२२ र तृतीय श्रेणीका २५ कोठा क्वारेन्टाइनका लागि उपलब्ध गराइने छ । होटलमा बस्न आउने कम्तीमा १० जनाको समूह हुनुपर्ने र सेवाग्राहीले पूर्वभुक्तानीको व्यवस्था गर्नुपर्ने मकवानपुर होटल एसोशियसनका अध्यक्ष शंकरलाल श्रेष्ठले बताए ।
प्रथम श्रेणीका होटलमा एउटा कोठामा बस्दा एक जनाको दुई हजार पाँच सय र दुई जनाको तीन हजार पाँच सय रुपियाँ र द्वितीय श्रेणीका होटलमा एउटा कोठामा एक जना बस्दाको एक हजार सात सय र दुई जना बस्दा दुई हजार पाँच सय रुपियाँ एक दिनको प्याकेजसहित तय गरिएको छ । यस्तै एक दिन बसेबापत तृतीय श्रेणीको होटलमा दुई जनाको एक हजार आठ सय र एक जनाको एक हजार दुई सय रुपियाँ शुल्क सेवाग्राहीले तिर्नुपर्ने छ । सरकारी क्वारेन्टाइनमा बस्न नचाहने र शुल्क तिरेर बस्न चाहनेका लागि होटलमा क्वारेण्टाइनको व्यवस्था गरिएको मकवानपुरका प्रमुख जिल्ला अधिकारी दीपकराज नेपालले जानकारी दिए ।
हेरांै यस्तो छ दर
१. मोटल एभकाडो, होटल सूर्यान्स (प्रतिब्यक्ति २५ सय, दुईजनाको ३५ सय
(प्रतिदिन)
२. होटल आर्शिवाद, रोयल क्राउन होटल, मेघा होटल, तुरही होटल , होटल मयुरी थकाली भान्छाघर, होटल वेलकम, न्यु मंगोलम होटल एण्ड लज (प्रतिब्यक्ति १७ सय, दुईजनाको २५ सय (प्रतिदिन)
३.होटल चण्डीका (प्रतित्तयक्ति १२ सय, दुई जनाको १८ सय (प्रतिदिन)
