टुडे संवादाता 
हेटौंडा/गत शनिबार सम्पन्न भएको कांग्रेस बागमती प्रदेशको पदाधिकारीको निर्वाचनको नतिजा सार्वजनिक भएको छ । सोमबार (हिजो) राति सम्पन्न मतगणना अनुसार कांग्रेस बागमती प्रदेश उप–सभापतिमा मोहन बहादुुर बस्नेत र चन्द्र महर्जन विजयी भएका छन् ।
बस्नेतले १०५९ मत र महर्जनले १०३७ मत प्राप्त गरेका छन। बस्नेत जगदीश्वर नरसिंह केसी र महर्जन इन्द्र बहादुर बानियाँ प्यानलबाट उम्मेदवार थिए ।
त्यसैगरी महामन्त्रीमा कंचन बादे र राजु श्रेष्ठ निर्वाचित भएका छन भने महामन्त्रीका अर्का उम्मेदवार माइकल रामचन्द्र अर्याल झिनो मतान्तरले पराजित भएका छन् । निर्वाचित बादेले ९९५ र श्रेष्ठले ९१० मत प्राप्त गरेका छन । बादे केसी र श्रेष्ठ बानियाँ प्यानलबाट उम्मेदवार बनेका थिए ।
त्यसैगरी सहमहामन्त्री महिलामा जीवन डङ्गोल निर्वाचित भएकी छिन् । उनले ९४९ मत प्राप्त गरेकी छिन् । सहमहामन्त्री खुला तर्फ ऋषिराम घिमिरे र हरिशरण श्रेष्ठ विजयी बनेका छन् । घिमिरेले ९१६ मत प्राप्त गर्दा श्रेष्ठले ८३९ मत प्राप्त गरेका थिए ।
बागमती प्रदेश सभापतिमा ईन्द्रबहादुर बानियाँ १५८ मतान्तरले निर्वाचित भइसकेका छन् ।
उनले सभापतिका अर्का उम्मेदवार जगदीश्वर नरसिंह केसीलाई पराजित गरेका थिए।
