हेटौंडा टुडे
हेटौंडा । प्रतिनिधिसभाका नवनिर्वाचित सांसदहरुकाे शपथ ग्रहण केहीबेरमा हुँदैछ । फागुन २१ गतेको निर्वाचनबाट प्रतिनिधि सभा सदस्यमा निर्वाचित सांसदहरु शपथ ग्रहणको लागि सिंहदरबार जाने क्रम चलिरहेको छ। दिउँसो २ बजे शपथ ग्रहणको कार्यक्रम रहेकाले उनीहरु सिंहदरबार जाने क्रम सुरु भएको हो।
प्रत्यक्षतर्फ १६५ र समानुपातिक निर्वाचन प्रणालीतर्फबाट ११० जना निर्वाचित भएका हुन् । जेष्ठ सदस्य नेपाली कांग्रेसका सांसद अर्जुननरसिंह केसीले राष्ट्रपतिबाट हिजै (बुधबार) नै प्रतिनिधिसभा सदस्यको शपथ लिइसकेका छन् । आज बाँकी सांसदलाई उनले शपथ गराउने छन् ।
संवैधानिक प्रावधानअनुसार सभामुख र उपसभामुखको निर्वाचन नै नभएको वा दुवै पद रिक्त रहेको अवस्थामा सभाको अध्यक्षता ज्येष्ठ सांसदले गर्नुपर्नेछ भन्ने व्यवस्था छ।
सांसदहरु आ-आफ्नाे भेषभूषामा सजिएर शपथ लिँदैछन् । अधिकांश सांसदहरु पहिलोपटक संसदको यात्रा तय गरेका हुन् । यो पटक संसदमा ६ दलले संसदमा प्रतिनिधित्व गर्दै छ । सबैभन्दा बढी राष्ट्रिय स्वतन्त्र पार्टीबाट विजयी भएका सांसदहरु छन् ।
