हेटौंडा टुडे
हेटौंडा । विजय बरालको मुख्य भूमिका रहेको फिल्म ‘जनै हराएको मान्छे : सम्बन्धका धागाहरू’को ट्रेलर सार्वजनिक भएको छ। सार्वजनिक ट्रेलरमा आर्थिक अभाव, कोरिया जाने सपना र त्यसका लागि मुख्य पात्रले गर्ने संघर्ष देखाइएको छ।
मुख्य पात्र विजय बराल कोरिया जाने सपना, संघर्ष र काठमाडौँ आएपछि खानुपरेको हन्डरदेखि ठगिएको कथा ट्रेलरमा समेटिएको छ।
कोरिया जान नसकेपछि काठमाडौँमा छटपटिएर बसिरहँदा भेटिने मिरुना मगर र उनीसँगको प्रेमले ट्रेलरलाई रोचक बनाएको छ।
पारिवारिक कथामा बनेको यो फिल्म भदौ ६ गते रिलिज हुँदै छ। हिमाल न्यौपानेले निर्देशन गरेको यो चलचित्रको असोसियट निर्देशकमा ‘प्रेमगीत ३’ अभिनेता मनिष राउत छन् ।
राउतले यसअघि ‘प्रेमगीत ३’ मा मुख्य भूमिका निभाएका थिए भने अहिले निर्देशनतर्फ पाइला चालेका छन्।
यस फिल्ममा विजय र मिरुनासँगै केकी अधिकारी, सुशांक मैनाली, गौरव पहाडी, भोलाराज सापकोटा, रियर राई, तारा शर्मा, भावना खपांगी मगर, रुपेश लामा, सुमन थापालागायतको अभिनय छ।
पेपरक्लिपको ब्यानरमा निर्माण भएको चलचित्रका निर्माता कमल न्यौपाने र विमल न्यौपाने हुन्। फिल्मको कथा, पटकथा र संवाद भानुभक्त ढकालले लेखेका छन्।
अलटाइम ब्लकबस्टर फिल्म ‘पूर्णबहादुरको सारंगी’पछि विजय बरालको मुख्य भूमिकामा आउन लागेको यस वर्षको यो पहिलो चलचित्र हो।
