हेटौंडा टुडे
हेटौंडा । बागमती प्रदेश प्रहरी कार्यालय हेटौंडाको आयोजनामा तथा हेटौंडा उपमहानगरपालिकाको सहकार्यमा आज हेटौंडाको रोयल पार्टी प्यालेसमा लागू औषध नियन्त्रण सम्बन्धी सचेतनामूलक कार्यक्रम सम्पन्न भएको छ।
कार्यक्रमको उद्घाटन गर्दै हेटौंडा उपमहानगरपालिकाकी मेयर मिना कुमारी लामाले लागूऔषध नियन्त्रणका लागि अब स्थानीय सरकारले समेत लगानी गरेर काम गर्ने बताएकी छन्। लागूऔषध नियन्त्रण थुनेर मात्र सम्भव नहुने उल्लेख गर्दै उनले सबै क्षेत्रबाट सचेतना फैलाएर मात्र यसको न्यूनीकरण गर्न सकिने बताइन्। लागूऔषधका कारण हेटौंडामा ठूलो चुनौती बढ्दै गएकोप्रति चिन्ता व्यक्त गर्दै उनले यसलाई नियन्त्रण गर्नु आजको आवश्यकता भएको धारणा पनि राखिन् ।
लागू औषत नियन्त्रणमा हेटौंडा उपमहानगरपालिकाले विभिन्न कार्यक्रमहरू गर्दै आइरहेको र आगामी दिनहरुमा यस्ता कार्यक्रमहरु अझै सशक्त रूपमा सञ्चालन गर्ने बताए मेयर मिना कुमारी लामाले बताइन्। लागू औसत नियन्त्रणमा विद्यालय, टोल विकास संस्था, जनप्रतिनिधि, प्रहरी, स्थानीय बासिन्दा सबैको सहयोगको आवश्यकता रहेको जानकारी गराउनुभयो ।
कार्यक्रममा मकवानपुरका प्रमुख जिल्ला अधिकारी बसन्त अधिकारीले लागूऔषधका कारण हेटौंडाको अवस्था भयावह बन्दै गएको बताए। लागूऔषध नियन्त्रणका लागि प्रदेश सरकार र स्थानीय सरकार दुवै सक्रिय हुनुपर्नेमा जोड दिँदै उनले लागूऔषधका कारण जिल्लामा अन्य अपराधका घटनासमेत तीव्र रूपमा बढ्दै गएको बताए। हेटौंडा लागूऔषध ओसारपसारको ट्रान्जिट बिन्दु बन्दै गएकोतर्फ समेत उनले ध्यानाकर्षण गराए। हाल लागू औषध सम्बन्धी कसुरमा राक्सिराङ्ग गाउँपालिकाको मात्र ३०४ जना व्यक्ति पक्राउ परेको जानकारी दिनुभयो ।
बागमती प्रदेश प्रहरी कार्यालय हेटौंडाका प्रमुख प्रहरी नायब महानिरीक्षक अरुण पौडेलले लागूऔषधसहित पक्राउ गर्ने कार्य निरन्तर भइरहेको जानकारी दिए। अबका दिनमा यसको न्यूनीकरणका लागि सबै पक्ष मिलेर काम गरे मात्र सफलता हासिल गर्न सकिने उनको भनाइ थियो। लागूऔषध नियन्त्रणका कार्यमा मकवानपुर जिल्लालाई प्रदेश प्रहरी कार्यालयबाट सक्दो सहयोग रहने उनले प्रतिबद्धता व्यक्त गरे।
नेपाल पत्रकार महासंघ बागमती प्रदेशका उपाध्यक्ष हरि हुमागाईंले लागूऔषध नियन्त्रणका लागि स्थानीय सरकारले टोल–टोलमा संयन्त्र निर्माण गरी काम गर्नुपर्ने आवश्यकता औंल्याए। सडक निर्माणलाई मात्र विकास नठान्न आग्रह गर्दै उनले लागूऔषधका कारण समाज भयावह बन्दै गएकोले यसको नियन्त्रणमा स्थानीय सरकारले प्राथमिकताका साथ लगानी गर्नुपर्ने बताए। साथै लागू औषध नियन्त्रण गर्नका लागि चुरियामाई नाकालाई सशक्त बनाउनु पर्ने जानकारी दिनुभयो।
जिल्ला प्रहरी कार्यालय मकवानपुरका प्रहरी नायब उपरीक्षक पुष्कर बोगटीले लागूऔषधका कारण मकवानपुर जिल्लामा भइरहेका अपराधसम्बन्धी तथ्याङ्क प्रस्तुत गरेका थिए।
कार्यक्रममा हेटौंडा उपमहानगरपालिकाका प्रवक्ता तथा वडा नम्बर–१ का अध्यक्ष सविन न्यौपाने, आधुनिक राष्ट्रिय माध्यमिक विद्यालयका प्रधानाध्यापक राधासागर गुरागाईं लगायतले पनि मन्तव्य व्यक्त गरेका थिए।
कार्यक्रममा हेटौंडा उपमहानगरपालिकाकी मेयर मिना कुमारी लामा, मकवानपुरका प्रमुख जिल्ला अधिकारी बसन्त अधिकारी, बागमती प्रदेश प्रहरी कार्यालय हेटौंडाका प्रमुख प्रहरी नायब महानिरीक्षक अरुण पौडेल, नेपाल पत्रकार महासंघ बागमती प्रदेशका उपाध्यक्ष हरि हुमागाईं, जिल्ला प्रहरी कार्यालय मकवानपुरका प्रहरी नायब उपरीक्षक पुष्कर बोगटी, हेटौंडा उपमहानगरपालिकाका प्रवक्ता तथा वडा नम्बर–१ का अध्यक्ष सविन न्यौपाने, आधुनिक राष्ट्रिय माध्यमिक विद्यालयका प्रधानाध्यापक राधासागर गुरागाईं, प्रदेश प्रहरी कार्यालय हेटौंडा, जिल्ला प्रहरी कार्यालय मकवानपुर, हेटौंडाका वडा अध्यक्षहरू, वडा सदस्यहरू, विद्यालयका शिक्षकहरू, यातायात व्यवसायी, पत्रकार तथा नागरिक समाजका प्रतिनिधिहरू लगायतको सहभागिता रहेको थियो।
