असार ११,हेटौंडा/आर्थिक वर्षको अन्तिममा बजेट फछ्र्यौट गर्नकै लागि हुँदै आएको विकास निर्माणको काम प्रभावकारी र दीगो नभएको धेरै उदाहरणहरु हामीले देख्दै र भोग्दै पनि आएका हौं । बजेट खल्तीमा हाल्नकै लागि गरिने यस्ता देखावटी विकासमाथि सरोकारवाला निकाय पनि मुकदर्शक बन्ने गरेका छन् ।

असारे विकासकै एउटा नमूना यसवर्ष मकवानपुरको मनहरी गाउँपालिका–५ नम्बर वडाको दरदरा–डिल्लीपुर जोड्ने सडकमा बनाउन लागिएको स्ल्याब ढलानमा देखिएको छ । गाउँपालिकाले निकालेको करिब २ करोड रुपैयाँको ठेक्कामा ४० प्रतिशत बिलोमा ठेक्का हाली १ करोड १० लाखमै सम्झौता गरेको काठमाडौंको एचबी मेघा कन्स्ट्रक्सनले लापरबाहीपूर्ण तरिकाले हिलो माटोमाथि ढलानको मसला हालेर पुरिरहेको भिडियो अहिले सामाजिक सञ्जालमा भाइरल भइरहेको छ । भिडियोमा देखिएअनुसार हिलो र पानी जमेको सडकमाथि कामदारहरुले सिमेन्ट, गिट्टी बालुवाको घोल हालिरहेका छन् । प्राविधिक ज्ञान नभएका स्थानीयले पनि ठेकेदार कम्पनीको काममा लापरबाही भएको प्रष्ट ठम्याएका छन् । उनीहरुले त्यहाँ काम गतिलो नभएको भन्दै आपत्ति जनाइरहेको पनि भिडियोमा देखिन्छ ।

यस्तो लापरबाहीपूर्ण कामको भिडियो र फोटो बाहिरिएपछि हामीले गाउँपालिकाका जनप्रतिनिधिलाई सम्पर्क गरी काममा भइरहेको लापरबाहीबारे सोधेका थियौं । गाउँपालिका वडा नम्बर ५ का अध्यक्ष शुभराज थिङ ले भने काम भर्खर सुरु गरिएको र सबै प्राविधिक प्रक्रिया पु¥याएको भन्ने जानकारीमा आएको बताए । ‘साथीहरुसँग कुरा गर्दा सबै हालेर गरेका छौं । हेर्दा राम्रै छन् भन्छन् साथीहरु, केही साथीहरुले फोटो खिचेर यताउती भाइरल गरिदिएछ सर, काम बिगारेकै हो भने अनुसन्धान गरेर कारबाही गर्नुपर्छ ।’ वडाध्यक्ष थिङ ले फोनमार्फत कुराकानीमा भने । उक्त काम भएको दिन गाउँपालिकाको प्राविधिक पनि नपुगेको उनले स्वीकार गरे । समस्या भए नभएकोबारे फिल्डमा गएर हेरेर प्राविधिक जाँच गरेपछि मात्रै थाहा हुने र आफू काम भइरहेको स्थानमा जान लागेको उनले बताए ।

गाउँपालिका अध्यक्ष एकराज उप्रेतीले भने सामाजिक सञ्जालमा आएको भिडियोबारे आफूले जानकारी पाएको र प्राविधिकसहित त्यस स्थलमा पुग्नै लागेको जानकारी दिए । ‘जनप्रतिनिधि र सचेत नागरिकलाई त्यस ठाउँमा उभिनुस् भनिसकेको छु । ठेकेदारले त काम गरेर पैसा लिएर जाला । हामीले यत्तँे दुःख गरेर पैसा हालेका छौं । लापरबाही गर्न दिनुहुँदैन भनेर मैले भनिरहेको छु ।’ अध्यक्ष उप्रेतीले भने–‘ग्राभेल पुरेर काम गर्नुपर्ने थियो । त्यो भिडियोमा हेर्दा मलाई पनि चित्त बुझेको छैन । त्यत्रो पैसा हालेको छ, जनतालाई सुविधा होस् भनेर, इन्जिनियर पनि पठाउँछु, वास्तविकता के रहेछ बुझ्छु ।’प्रदेश सञ्चार डटकम बाट

हेर्नुहोस् भिडियो ,