टुडे संवादाता 
काठमाडौं/प्रतिनिधिसभा विघटनपछि सञ्चालन भएको राष्ट्रियसभा हिउँदे अधिवेशनको दोस्रो बैठक बिहीबार बस्दै छ । यसअघि शुक्रबार (पुस १७) गते बसेको बैठकले बिहीबार दिउँसो १ बजे बस्नेगरी स्थगित भएको थियो ।
संसद सचिवालयका अनुसार बिहीबारको बैठकमा प्रधानमन्त्री केपी ओलीले मधेसी आयोगको वार्षिक प्रतिवेदन पेश गर्ने कार्यसूची रहेको छ ।
बैठकमा राष्ट्रियसभाका अध्यक्ष गणेशप्रसाद तिमल्सिनाले विषयगत समितिमा रहने सदस्यको नाम मनोनयनका लागि प्रस्ताव गर्नेछन् । बैठकमा नियमित कार्यसूचीसँगै प्रतिनिधिसभा विघटनको विषयमा राष्ट्रियसभा सदस्यले धारणा राख्नेछन् ।
अघिल्लो बैठकमा राष्ट्रियसभाका सदस्य दीननाथ शर्मा, जितेन्द्र नारायण देव र प्रमिला कुमारीले सम्बोधन गरेका थिए । उनीहरुले प्रतिनिधिसभा विघटनको विरोध गरेका थिए ।
पुस ५ गते प्रधानमन्त्री ओलीले प्रतिनिधिसभा विघटन गरेपछि राष्ट्रियसभा एकल रुपमा सञ्चालन भएको हो ।
