हेटौडा ।  हेटौँडा उपमहानगरपालिका–१० स्थित बसपार्कमा गाडी पार्किङको विषयलाई लिएर बिहीबार बिहान करिब ११:३० बजे भएको विवादमा धारिलो हतियार प्रहार हुँदा चार जना घाइते भएका छन्। उक्त घटनापछि घाइतेहरूलाई हेटौँडामा प्राथमिक उपचार गराई थप उपचारका लागि चितवन पठाइएको छ भने घटनामा संलग्न रहेको आरोपमा चारै जनालाई प्रहरीले नियन्त्रणमा लिएको छ। जिल्ला प्रहरी कार्यालय मकवानपुरका अनुसार मनहरी गाउँपालिका–१ मकरी बस्ने ३०/३१ वर्षीय लक्ष्मण बर्तौलासँग गाडी पार्किङको विषयमा झै-झगडा भएको थियो।

सोही विवादका क्रममा बर्तौलाले अन्य सहयोगीहरू बोलाई धारिलो हतियार प्रहार गरेको आरोप छ । हतियार प्रहारबाट मकवानपुर मनहरी–६ का २७ वर्षीय जीवन गोले, ओखलढुङ्गा सिंहदेवी–७ का २८ वर्षीय राइज आले मगर, चितवन राप्ती–२ का ३२ वर्षीय राम बहादुर पाख्रिन र चितवन राप्ती–४ का २८ वर्षीय जीवन तामाङ घाइते भएका छन्। घाइतेमध्ये गोले र पाख्रिनको अवस्था मध्यम रहेको छ भने मगर र तामाङको अवस्था सामान्य रहेको छ। घटनालगत्तै प्रारम्भिक उपचारका लागि गोले र आले मगरलाई हेटौँडा अस्पताल तथा पाख्रिन र तामाङलाई सीएमसी हेटौँडा अस्पताल भर्ना गरिएको थियो। पछि थप उपचारको लागि चारै जनालाई चितवनतर्फ पठाइएको प्रहरीले जनाएको छ।

घटना लगतै जिल्ला प्रहरी कार्यालय मकवानपुर, प्रहरी चौकी बसपार्क र वडा प्रहरी कार्यालय सानोपोखराबाट खटिएको टोलीले फरार रहेकाहरूको खोजी तीव्र पारेको थियो। प्रहरी टोलीले मुख्य आरोपी लक्ष्मण बर्तौलासहित हेटौँडा–१२ का ३३ वर्षीय सुनिल थिङ्ग, हेटौँडा–१५ का २८ वर्षीय करन लामा र मनहरी–१ का २३ वर्षीय उज्ज्वल बर्तौलालाई नियन्त्रणमा लिएको छ। पक्राउ परेका सबै जनालाई जिल्ला प्रहरी कार्यालयको नियन्त्रणमा राखी थप अनुसन्धान भईरहेको प्रहरीले जनाएको छ।