टुडे संवादाता 
हेटौंडा/हेटौंडामा आगामी फागुन २७ गतेदेखि स्थानीय तह शहिद स्मृति गोल्डकप राष्ट्रिय फुटबल प्रतियोगिताको तेस्रो संस्करण हुने भएको छ । सोमबार पत्रकार सममेलन गर्दे मकवानपुर जिल्ला फुटबल संघले हेटौंडा उपमहानगरपालिका वडा नम्बर १० स्थित फरेष्ट्री क्याम्पसको खेलमैदानमा फागुन २७ गतेदेखि प्रतियोगिता संञ्चालन हुने जानकारी दिएको छ ।
प्रदेश खेलकुद विकास परिषद् बागमती प्रदेशको विशेष सहयोग तथा मकवानपुरको स्थानीय तहहरुको प्रायोजनमा प्रतियोगिता संचालन हुने भएको मकवानपुर जिल्ला फुटबल संघले जनाएको छ । प्रतियोगितामा ‘ए’ डिभिजनका ६ वटा र मोफसलका ४ वटा क्लबहरुले सहभागिता जनाउने आयोजकले जनाएको छ ।
प्रतियोगितामा प्रथम र दोस्रो हुने टिमले क्रमशः नगद १० लाख र ५ लाख रुपैयाँसहित शिल्ड, मेडल र प्रमाणपत्र प्राप्त गर्नेछन् ।त्यस्तै, सर्वोत्कृष्ट खेलाडिले नगद ५० हजार रुपैयाँ, विद्यागत उत्कष्ट खेलाडीले जनही २५ हजार रुपैयाँ र म्यान अफ दि म्याच हने खेलाडीले नगद १० हजार रुपैयाँ प्राप्त गर्नेछन् ।प्रतियोगिताको मुख्य आयोजकमा मकवानपुरका १० वटा स्थानीय तहहरु रहेका छन् ।
जिल्ला समन्वय समिति मकवानपुरको समन्वयमा मकवानपुरका स्थानीय तहहरुले ७० लाख रुपैयाँमा प्रतियोगिताको प्रायोजन गरेका हुन् ।कुल ९४ लाख ४० हजार ५ सय रुपैयाँको लागतमा संचालन हुने उक्त प्रतियोगितमा मुख्य प्रायोजकबाट ७० लाख रुपैयाँ, टिकटबाट १४ लाख ५० हजार रुपैयाँ तथा अन्य सहयोगबाट ९ लाख ९० हजार रुपैयाँ संकलन गर्ने आयोजकले जनाएको छ । प्रतियोगिता चैत्र ७ गतेसम्म संचालन हुनेछ ।
