टुडे संवादाता 
हेटौंडा /१११ औं अन्तराष्ट्रिय महिला दिवसको अवसरमा आयोजित मकवानपुरमा महिला पत्रकारको अबस्था विषयक अन्तरक्रिया कार्यक्रम आईतबार (आज)हेटौंडामा भएको छ । क्रियाशिल पत्रकार महिला मकवानपुरको आयोजनामा भएको कार्यक्रममा हेटौंडा उपमहानगरपालिकाकी उपमेयर मिना कुमारी लामाको प्रमुख आतिथ्यता रहेको थियो ।
कार्यक्रममा बोल्दै उपमेयर लामाले पत्रकारहरुको हक हितका लागि उपमहानगरपालिकाले पत्रकार बिमा ,पत्रकार उपचारकोषमा सहयोग लगाएका विभिन्न काम गरेको बताउनुभयो ।
उहाँले पुरुष पत्रकारकै सरह महिलालाई अवसर दिएर जिवन्त क्रियाशिल बनाउनुपर्ने बताउनुभयो । आगामी दिनमा पत्रकारहरुलाई हरेक क्षेत्रमा उपमहानगरपालिकाले समन्वय गर्ने उपमेयर लामाले प्रतिबद्धता व्यक्त गर्नुभयो ।
कार्यक्रममा सहभागी महिला पत्रकारहरुले सबै क्षेत्रका समस्याका बारेमा सामाचार सम्प्रेषण गरिरहेको अवस्थामा महिला पत्रकारहरुकै समस्या ओझेलमा परेको गुनासो व्यक्त गरेका थिए ।
हाल मकवानपुरमा पत्रकार महासंघमा १६३ सदस्य रहेका छ्न जसमा ४० जना महिला पत्रकार रहेका छ्न ।
कार्यक्रममा नेपाल पत्रकार महासंघ मकवानपुरका अध्यक्ष हरि हुमागाई ,प्रेस संगठन मकवानपुरका संयोजक धर्मेन्द्र दहाल ,प्रेस युनियन मकवानपुरका अध्यक्ष कुमारअधिकारी (पोस्टराज) लगाएत जिल्लाका क्रियाशिल पत्रकारहरुको सहभागीता रहेको थियो ।
